पाँच वर्षभित्र चीनले ल्हासादेखि खासासम्म रेलसेवा विस्तार गर्ने

चीनले तिब्बतको ल्हासादेखि नेपालको सिमावर्ती खासासम्मको रेलमार्ग आगामी पाँच वर्षभित्र विस्तार गर्ने जनाएको छ ।

नेपाल भ्रमणमा रहेको चिनियाँ कम्युनिष्ट पार्टीको प्रतिनिधि मण्डलले शुक्रबार बिहान प्रधानमन्त्री गिरिजाप्रसाद कोइरालालाई भेटी आफ्नो मुलुकले चालु ११ औं पञ्चवर्षिय योजनामा सो रेल मार्ग विस्तार योजनालाई समेटेको जानकारी गराएको हो ।

नेपाल सरकारले सो रेलमार्ग विस्तारका लागि चीनलाई पटक पटक औपचारिक आग्रह गरेको थियो । चिनियाँ कम्युनिष्ट पार्टीका महानिर्देशक आइ पिङ नेतृत्वको टोली र प्रधानमन्त्री कोइरालाबीच संविधानसभा निर्वाचनपछि नेपालमा विकसित राजनीतिक घटनाक्रम, दुई मुलुकबीचको पारस्परिक सम्बन्धलगायतका बारेमा पनि छलफल भएको प्रधानमन्त्रीका विदेश सल्लाहकार आदित्य बरालले जानकारी दिनुभयो ।

पाँच दिनअघि नेपाल आएको चार सदस्यीय सो टोली आज स्वदेश फर्कदैँ छ ।