नेपाल र बहराइनबीच मंगलबार श्रम सम्झौता भएको छ । बहराइनमा कार्यरत
नेपाली कामदारले स्थानीय र अन्य विदेशी श्रमिक सरह कानुनी हैसियत पाउनेछन् ।
यसअघि बहराइनमा कार्यरत नेपाली कामदारले स्थानीय श्रम कानुनअनुसार संरक्षण र अधिकार पाएका थिएनन् । त्यहाँका रोजगारदाता र नेपाली कामदारबीच भएको करारपत्र अनुसारका सुविधा नपाउँदा पनि बहराइनका न्यायिक निकायले नेपाली कामदारका पक्षमा निर्णय गर्न सक्ने अवस्था थिएन ।
सहमतिमा नेपाली कामदारलाई व्यावसायिक तालिमसमेत उपलब्ध गराउने उल्लेख छ । कतार र युनाइटेड अरब इमिरेट्ससँग श्रम सम्झौता हुँदा यस्तो सहयोग उल्लेख थिएन ।
सहमतिपत्रमा हस्ताक्षर गर्दै श्रम मन्त्री रमेश लेखक र बहराइनका श्रम मन्त्री डा. मजिद बिन महसिन अल अलावीले यो अवसर दुवै देशका लागि उपलब्धिमूलक हुने बताए । तीव्र विकासको गतिमा अघि बढेको बहराइनका लागि ठूलो संख्यामा अदक्ष, अर्धदक्ष र दक्ष कामदार आवश्यक परेको छ भने श्रम बजारमा बर्सेनी भित्रने साढे तीन लाख युवालाई रोजगारी चाहिएको छ ।
मन्त्री लेखकले सहमतिपछि बहराइनले नेपाली युवालाई प्राथामिकताका साथ रोजगारी उपलब्ध गराउने विश्वास व्यक्त गरे । 'यसबाट दुवै देशको स्रोत र क्षमता उपभोग हुनेछ,' उनले भने । उनले सम्झौता अनुसार बहराइनको श्रम कानुनले त्यहाँ कार्यरत र अब जाने नेपाली श्रमिकलाई कानुन अनुसार सुविधा र अधिकार उपलब्ध हुने बताए ।
श्रम मन्त्री अलावीले वहराइनमा पछिल्लो दुई वर्षमा ५ सय प्रतिशतले लगानी वृद्धि भएकाले ठूलो संख्यामा श्रमशक्ति आवश्यक भएको बताए । उनले बहराइनले अदक्ष श्रमिकलाई पनि विकासका साझेदारका रूपमा लिने गरेको जानकारी दिँदै नेपाली जनशक्तिप्रति अन्यत्रभन्दा बढी जोड दिने बताए । बहराइनले १० भन्दा बढी देशबाट कामदार लिँदै आएको छ ।
अलावीले हालसम्म बहराइनमा नेपालीको कुनै पनि अपराध दर नभएको, शान्त र मेहनती भएकाले प्राथामिकता दिइने नीति अवलम्बन गरिएको बताए ।
नेपाली कामदारको दक्षता अभिवृद्धिका लागि नेपालले पर्याप्त पहल गर्नुपर्छ, त्यसका लागि हामी पनि सहयोग गर्न तयार छौं, उनले भने । भारत, बंगलादेश, श्रीलंका, पाकिस्तान लगायत मुलुकका कामदारसँग नेपालले प्रतिस्पर्धा गर्नुपर्ने भएकाले क्षमता बढाउन अझ आवश्यक भएको उनको जोड थियो ।
लेखकले बहराइनका रोजगारदाता र नेपाली कामदारबीचको आपसी सम्झौताका आधारमा तलब निर्धारण हुने भएकाले सहमतिमा न्यूनतम तलबबारे उल्लेख नगरिएको बताए । न्यूनतम तलब कामदार र रोजगारदाताबीचको कुरा भए पनि बहराइनको कानुनबमोजिम नेपाली कामदारले सुरक्षा पाउने छन्, उनले भने ।
व्यवसायजन्य तालिममा बहराइनले सहयोग गर्ने आश्वसन प्राप्त भएकाले अदक्ष कामदार पठाउने बाध्यताबाट सरकार मुक्त हुने विश्वास लेखकको छ ।
बहराइनमा नेपालले १० हजार कामदार औपचारिक रूपमा गएको देखाएको छ भने बहराइनका श्रम मन्त्रीले करिब ३० हजार नेपाली कामदार त्यहा“ भएको बताए । उनका अनुसार बहराइनमा अर्न्तराष्ट्रिय स्तरका ५ सय भन्दा बढी बैंक भएकाले बैंक, उद्योग, निर्माण, सेवा क्षेत्रलगायतका व्यवसायका लागि कामदार आवश्यक छन् । वैदेशिक रोजगार व्यवसायी संघका अध्यक्ष तिलक रानाभाटले बहराइनसँको श्रम सम्झौताले थप रोजगारीका अवसर प्राप्त हुने जनाए ।
