अनमीनको कार्यदिशा स्पष्ट पार्न नेपाल सरकारलाई आग्रह

राष्ट्र संघीय महासचिव वान कि मुनले नेपाल सरकारले चाहेको राष्ट्र संघीय राजनीतिक मिसन अनमीनको कार्यदिशा प्रष्ट पार्न आग्रह गर्नुभएको छ।

सुरक्षा परिषद्‌मा सोमबार पेस भएको नेपालसम्बन्धी प्रतिवेदनमा महासचिव वानले नेपाल सरकारले पठाएको पत्र अनमीनलाई राजनीतिक मिसनका रुपमा निरन्तरता दिनेबारे अस्पष्ट रहेको उल्लेख गर्नुभएको छ। उहाँले नेपाल सरकारद्वारा गत मंगलबार प्रेसित पत्र कार्यदेशबारे अस्पष्ट रहेकाले राजनीतिक मिसनका रुपमा अनमीनको निरन्तरताका लागि प्रस्ताव गर्न अप्ठ्यारो परेको बताउनुभएको छ।

सोमबार न्युयोर्कमा सार्वजनिक नेपालसम्बन्धी महासचिव वानको प्रतिवेदनमा अन्मिनको कार्यदेशबारे स्पष्ट नपारी सरकारले अनुरोध गरेअनुसार ६ महिना कार्यअवधि थप्न नसकिने उल्लेख छ।

आगामी शुक्रबारसम्म राष्ट्र संघीय सुरक्षा परिषदमा सुरु हुने नेपालसम्बन्धी छलफलअघि अन्मिनको कार्यदेश स्पष्ट नभए त्यसमा पुनःविचार गर्न अन्मिनको कार्यवधि एक महिना मात्र थप गर्न सकिने प्रतिवेदनमा उल्लेख छ ।

नेपालमा शान्ति प्रक्रिया संस्थागत भैसकेकाले  सेना तथा हतियार अनुगमन प्रयोजनका लागि मात्रै अनमीनको कार्यअवधि ६ महिना थप गर्न आवश्यक नरहेको समेत महासचिव वानले बताउनुभएको  छ।

सो अनुरोधमाथि सुरक्षा परिषदमा आगामी शुक्रबार छलफल भई त्यसको चार दिनपछि निर्णय हुने राष्ट्र संघका लागि नेपालका स्थायी प्रतिनिधि मधुरमण आचार्यले जानकारी दिनुभएको छ।