कांग्रेसले माओवादीसँग भएको हतियार नष्ट गर्ने शर्त अगाडि सार्ने

नेपाली कांग्रेसले नयाँ सरकार गठनपूर्व माओवादीको साथमा रहेका हतियार नष्ट गरिनुपर्ने वा सरकारलाई बुझाउनुपर्ने शर्त अगाडि सार्ने भएको छ । रिपोर्र्टर्स क्लब नेपालद्वारा आज आयोजित साक्षात्कार कार्यक्रममा कांग्रेस उपसभापति गोपालमान श्रेष्ठले यस्तो खुलासा गर्नुभएको हो ।

उहाँले माओवादीको हतियार नष्ट गर्ने या सरकारलाई बुझाउने शर्त प्रस्तुत गर्नेबारे पार्टीको धारणा अन्तिम चरणमा पुगिसकेको बताउनुभयो । श्रेष्ठले राजनीतिक दलसम्वद्ध सेनाका कमाण्डर राष्ट्रप्रमुख बन्न नसक्ने बताउँदै माओवादीले हतियार र जनसेनाबारे आफूहरुले राखेको शर्त पूरा गरेपछि मात्र नयाँ सरकारका गठनबारे छलफल अघि बढ्ने बताउनुभयो ।

सेनाका प्रमुखलाई सत्ता हस्तान्तरण गरेर मुलुक बर्बाद बनाउने पक्षमा कांग्रेस नरहेको दाबी गर्दै श्रेष्ठले प्रधानमन्त्री गिरिजाप्रसाद कोइरालाले सरकारबाट हट्नुपर्ने कुनै कारण नभएको जिकिर गर्नुभयो ।

उहाँले माओवादीको यूवा संगठन वाइसिएल तत्काल बिघटन गर्नुपर्ने, कब्जा गरिएका घरसम्पत्ति फिर्ता गर्नुपर्ने, विस्थापितलाई पुनःस्थापित गर्नु पर्ने बताउँदै  लोकतान्त्रिक पद्धति निर्माणका लागि सत्ता नछाड्ने निर्णयमा कांग्रेस पुगेको बताउनुभयो ।