विद्यत् प्राधिकरणले मंगलबारदेखि लोडसेडिङ अवधि आधा कटौती गर्ने भएको छ । अब लोडसेडिङ सातामा २१ घन्टा र औसतमा दैनिक चार घन्टा मात्र हुनेछ । यसअघि सातामा ४२ घन्टा र दैनिक सात घन्टा लोडसेडिङ थियो ।
प्राधिकरणले खोलामा पानीको सतह बढेपछि बिजुली उत्पादनमा सुधार भएको जनाउँदै लोडसेडिङ घटाउने निर्णय गरेको हो । बिजुली खपतमा केही कमी आएको र भारतबाट थप २५ मेगावाट आयात भएकाले लोडसेडिङ आधा घटेको हो । प्राधिकरणको भारप्रेषण केन्द्रका प्रमुख शेरसिंह भाटका अनुसार तापक्रम बढेर हिउँ पग्लन सुरु भएपछि नदीमा पानीको सतह पनि बढेको छ । कुलेखानी पहिलो र दोस्रो (९२ मेगावाट) बाहेक सम्पूर्ण विद्युत् गृह बगिरहने पानीमा आधारित भएकाले नदीमा पानीको सतह बढ्दा बिजुली उत्पादन बढ्ने र घट्दा घट्ने हुन्छ ।
बिहान, दिउँसो, अपराह्न र बेलुकी गरी चार पटक हुँदै आएको लोडसेडिङ बेलुकीको बाहेक सातामा एक पटकमा सीमित भएको छ । साताको दुई दिन लोडसेडिङ हुने छैन । यसअघि एक दिन मात्र नहुने थियो । नयाँ व्यवस्थाअनुसार हरेक बिहान सातामा एक पटक ६ देखि १० बजेसम्म मात्र लोडसेडिङ हुनेछ । यसअघि ५ देखि ८, ५ देखि ९ र ६ देखि १० बजे लोडसेडिङ हुँदै आएको थियो ।
साताको एक पटक दिउँसो १० देखि २ बजेसम्म मात्र बिजुली आपूर्ति कटौती हुने जानकारी भाटले दिए । ९ देखि १२ बजेको लोडसेडिङ हटेको छ । प्राधिकरणले अपराह्नको लोडसेडिङ पनि घटाएको छ । नया“ तालिकाअनुसार सातामा २ देखि ६ बजेको मात्र कायम छ ।
सबैभन्दा बढी बिजुली खपत हुने बेलुकीको लोडसेडिङमा पनि हेरफेर गरेको छ । लोडसेडिङ नहुने दुई दिनबाहेक अरू दिनमा विभिन्न समयमा वर्गीकरण गरी लोडसेडिङ हुनेछ ।
बेलुकी छदेखि साढे आठ, साढे छदेखि नौ, छदेखि दस र सातदेखि साढे नौ बजेसम्म गरी भिन्नाभिन्नै समयमा लोडसेडिङ हुनेछ ।
उनका अनुसार यतिखेर पिकलोड ७०० देखि ७२० मेगावाटसम्म छ । भारतबाट पूर्ति, कुलेखानी पहिलो र दोस्रो, प्राधिकरणका अन्य गैरजलाशययुक्त विद्युतगृह समेत गरी करिब ४८० मेगावाट बिजुली उत्पादन भएको छ । 'माग र आपूर्तिअनुसार यतिखेर करिब २०० मेगावाट बराबरको लोडसेडिङ छ,' भाटले भने । प्राधिकरणका प्रमुख विद्युत्गृह १४४ मेगावाटको कालीगण्डकी 'ए' बाट ९०, ६९ मेगावाटको मर्स्याङ्दीबाट ५५ र चिलिमेबाट २० मेगावाटै बिजुली उत्पादन भएको छ ।
