बम विष्फोटमा माओवादी विधायकको काकाको मृत्यु

अज्ञात समूहले गएराति माओवादीका अन्तरिम विधायक विनोद उपाध्यायको रुपन्देहीस्थित घरमा बम विष्फोट गराउँदा उनका काकाको मृत्यु भएको छ।

रुपन्देहीको बोधबारास्थित उपाध्यायको घरमा राति ११.३० बजेतिर भएको विष्फोटमा उनका काका सुरेन्द्र उपाध्यायको घटनास्थलमै मृत्यु भएको प्रहरीले जनाएको छ।

सो समूहले विष्फोटअघि परिवारका अन्य सदस्यलाई नियन्त्रणमा लिएको थियो । विष्फोटनबाट घर पूर्ण रुपमा क्षतिग्रस्त भएको छ।

सोमबार मात्र राजावादीहरुले तराईबाट माओवादीविरुद्ध सशस्त्र संघर्ष गर्ने घोषणा गरेको भोलिपल्टै यो घटना भएको छ । घटनाको जिम्मा कसैले दिइसकेको छैन ।