संविधानसभामा अपांग प्रतिनिधित्वको माग

अपांगहरुले संविधानसभा निर्वाचनमा प्रतिनिधित्वको माग गरेका छन् । आज राजधानीमा पत्रकार सम्मेलन गरी उनीहरुले यस्तो माग गरेका हुन् । पत्रकार सम्मेलनमा दलहरुले बन्दसूचीमा राखेका अपांगको उपेक्षा गरे कडा कदम चाल्ने चेतावनी समेत दिएका छन् ।

राष्ट्रिय अपांग महासंघ-नेपालका अध्यक्ष वीरेन्द्रराज पोखरेलले अपांगहरुलाई दोस्रो दर्जा सरहको व्यवहार गरिएको आरोप लगाउँदै उनीहरुको न्यायिक प्रतिधित्वबाटै समस्याको निकास निस्कने धारणा राख्नुभयो । पोखरेलले अपांगको आवाज सम्बोधन गर्न उनीहरुको प्रतिनिधित्व अनिवार्य भएको बताउँदै संविधानसभा मनोनित २६ जना सदस्यहरुमध्येबाट अपांगको प्रतिनिधित्व हुनुपर्नेमा जोड दिनुभयो ।

नेपाल नेत्रहीन संघका अध्यक्ष नरबहादुर लिम्बूले संविधानसभामा नेत्रहीनको प्रतिनिधित्व आवश्यक भएको बताउनुभयो । त्यस्तै नेकपा एमालेबाट समानुपातिकका नेत्रहीन उम्मेदवार कुमार थापाले  अपांगलाई देखाउनका लागि मात्र उम्मेदवार बनाउनु उचित नहुने  बतउँदै उचित नहुने अपांगहरुको न्यायिक प्रतिनिधित्व हुनुपर्नेमा जोड दिनुभयो ।

कार्यक्रमका अन्य विभिन्न वक्ताहरुले पनि संविधानसभामा अपांगहरुको प्रतिनिधित्वमा जोड दिएका थिए ।