निर्वाचन आयोगले संविधान सभाका लागि समानुपातिकतर्फबाट विजयी भएका अन्तिम नामावली घोषणा गरेको छ ।
निर्वाचन आयोगले संविधान सभाका लागि समानुपातिकतर्फबाट विजयी भएका अन्तिम नामावली घोषणा गरेको छ । कान्तिपथस्थित आयोगको कार्यालयमा प्रमुख निर्वाचन आयुक्त भोजराज पोखरेलले उक्त घोषणा गर्नुभएको हो ।
निर्वाचन आयोगले समानुपातिक प्रणालीबाट संविधानसभामा प्रतिनिधित्व गर्ने २५ राजनीतिक दलहरुलाई उनीहरुबाट संविधानसभासद बनेकाहरुको नाममा प्रमाणपत्र दिएको छ ।
समानुपातिकतर्फ दलहरुले प्राप्त गरेको मतका आधारमा ३ सय ३५ सिट बाँडफाँड गरिएको छ । जसअनुसार माओवादीले एक सय, कांग्रेसले ७३, एमालेले ७०, मधेशी जनअधिकार फोरमले २२, तमलोपाले ११ सिट प्राप्त गरेका छन् ।
निर्वाचन आयोगमा आयोजित समानुपातिक प्रणालीको अन्तिम नतिजा प्रकाशन कार्यक्रममा मधेशी जनअधिकार फोरमबाहेक सबै दलका प्रतिनिधि उपस्थित थिए । प्रमाणपत्र बुझ्न माओवादीबाट दिनानाथ शर्मा, कांग्रेसबाट शोभाकर पराजुली, एमालेबाट भीम रावलको नेतृत्वमा टोली पुगेको थियो ।
निर्वाचन आयोगले दिएको जानकारी अनुसार, प्रत्यक्ष र समानुपातिक गरी संविधानसभामा निर्वाचित ५ सय ७५ सदस्यमा मधेशीको ३४.०९, दलितको ८.१७, जनजातिको ३३.३९, पिछडिएको क्षेत्रको ३.८३, अन्यको ३३.९१ र महिलाको ३३.२२ प्रतिशत प्रतिनिधित्व रहेको छ । २६ संविधानसभासद सरकारले मनोनित गर्ने ब्यवस्था रहेको छ ।
