संविधानसभा निर्वाचनपछि पहिलोपटक सात दलीय गठबन्धनको बैठक आज सम्पन्न भएको छ । प्रधानमन्त्री निवास बालुवाटारमा बसेको छ दल सम्मिलित बैठकमा जेष्ठको १२ देखि १६ गतेभित्र संविधानसभा बैठक बोलाउने सहमति भएको छ । बैठकमा नेपाल सदभावना पार्टीको भने सहभागिता थिएन ।
सोही बैठकले संविधानसभा बैठकको प्रक्रिया र २६ जना मनोनित संविधानसभा सदस्यको टुंगो लगाउन एक कार्यदल गठन गरेको छ । कार्यदलमा नेकपा माओवादीबाट वरिष्ठ नेता डा.बाबुराम भट्टराई र केन्द्रीय सदस्य कृष्णबहादुर महरा, कांग्रेसबाट उपसभापति रामचन्द्र पौडेल र महामन्त्री विमलेन्द्र निधि, नेकपा एमालेबाट स्थायी कमिटि सदस्य झलनाथ खनाल र केन्द्रीय सदस्य भीम रावल, जनमोर्चा नेपालबाट लिलामणि पोखरेल र घनश्याम शर्मा, नेकपा मालेबाट सीपी मैनाली र नेमकिपाबाट प्रेम सुवाल छन् ।
बैठकमा प्रधानमन्त्री गिरिजाप्रसाद कोइरालाले राष्ट्रिय सहमतिबाट अघि बढ्ने नीति बनाउन जोड दिँदै सबैलाई समेटेर जानुपर्ने बताउनुभयो । उहाँले संविधानसभा बैठक जतिसक्दो छिटो सम्पन्न गर्नुपर्नेमा जोड दिनुभएको थियो ।
माओवादी अध्यक्ष प्रचण्डले नयां सरकार गठनबारे छलफल भएको बताउदै आफ्नो नेतृत्वमा संयुक्त सरकार बन्ने बताउनुभयो । उहांले सहमति र सहकार्यबाट लोकतान्त्रिक गणतन्त्रको विकास गर्नेबारे छलफल केन्द्रित भएको जानकारी गराउनुभयो ।
