यातायात व्यवसायीले आव्हान गरेको चक्काजामका कारण पूर्वका चार अञ्चलको यातायात ठप्प भएको छ ।
यातायात व्यवसायीले आव्हान गरेको चक्काजामका कारण पूर्वका चार अञ्चलको यातायात ठप्प भएको छ ।
विभिन्न दश सूत्रीय माग राख्दै यातायात व्यवसायी राष्ट्रिय महासंघ, यातायात मजदुर संघ, ट्रक-ट्याङ्कर व्यवसायी महासंघलगायत आधा दर्जन संघ संगठन आवद्ध संयुक्त संघर्ष समितिले सोमबार विज्ञप्ति जारी गरी आजबाट पूर्वका मेची, कोशी, सगरमाथा र जनकपुरमा अनिश्चितकालीन चक्काजामको घोषणा गरेका हुन् ।
ऐनअनुसार कारबाही, साधन र मजदुरको सुरक्षा, क्षतिपुर्ति, पेट्रोलियम पदार्थको मूल्यवृद्धि फिर्ता, भाडादर वृद्धि, सडक दुर्घटनाबारे निष्पक्ष छानविन, संविधानसभामा यातायातकर्मीहरुको सहभागितालगायत दश सूत्रीय माग व्यवसायीहरुले अघि सारेका छन् ।
चक्काजामका कारण मुख्य तथा सहायक मार्गहरुमा समेत यातायातका साधन चलेका छैनन् । राजधानीलगायत अन्य क्षेत्रबाट पूर्व हिंडेका लामो दूरीका सवारी साधनलाई भने उनीहरुले गन्तव्यमा पुग्न दिएका छन् ।
उनीहरुले सरकारले तत्काल मागबारे ठोस निर्णय नगरे आन्दोलन देशव्यापी बनाउने चेतावनीसमेत दिएका छन् । चक्काजामका कारण सहरी र ग्रामीण बजारमा चहलपहल समेत न्युन भएको छ ।
