श्रेष्ठको हत्याको विरोधमा कोटेश्वर क्षेत्रमा प्रदर्शन

नेकपा माओवादीका कार्यकर्ताद्वारा राजधानीका व्यापारी रामहरि श्रेष्ठको हत्या गरिएको विरोधमा आज पनि कोटेश्वर क्षेत्रमा प्रदर्शन भइरहेको छ । श्रेष्ठको परिवार र आफन्तले हत्याराको कारबाहीको माग गर्दै सो क्षेत्रमा सवारी साधन चल्न दिइएको छैन ।

उनीहरुले माओवादीविरुद्ध नारावाजी गरि रहेका छन् भने हत्याको पुष्टि भइसक्दा पनि सरकार मौन रहेको भन्दै तत्काल उचित कदम चाल्न दबाब दिएका छन् । माओवादी समर्थक श्रेष्ठलाई १७ लाख रुपैयाँ रकम र पेस्तोल चोरेको आरोप लगाउदै वैशाख १५ गते कोटेश्वरस्थित निवासबाटै छानबीनका लागि भनि अपहरण गरिएको थियो ।

चितवनस्थित जनमुक्ति सेनाको अस्थायी शिविरमा पुर्‌याइएकोमा छानबिनका क्रममा कुटपिटबाट श्रेष्ठको मृत्यु भएको माओवादी स्वयंले पुष्टी गरिसकेका छन् । माओवादीले उनको कुटपिटका क्रममा निधन भएको खबर जेष्ठ २ गते मात्र परिवारलाई जानकारी गराएका थिए । 

माओवादीले हत्यामा संलग्न भएकालाई प्रहरी समक्ष बुझाएका छन् । उनीहरुले श्रेष्ठको हत्या गरी शव नारायणी नदीमा फालिएको बयान दिएको प्रहरीले जनाएको छ ।