पहिलो बैठकले गणतन्त्र कार्यन्वयन नगर्ने दाबी

राप्रपा नेपालका अध्यक्ष कमल थापाले संविधानसभाको पहिलो बैठकले गणतन्त्र कार्यन्वयन गर्न नसक्ने दावी गरेका छन् ।  

जेठ ७ गते संविधानसभाको समानुपातिक प्रणालीबाट निर्वाचित पार्टीका चार सभासदको सम्मानमा आयोजित कार्यक्रममा बोल्दै थापाले संविधानसभामा गणतन्त्रवादीको ठूलो हैसियत र संख्या भए पनि गणतन्त्र कार्यन्वयन नहुने उल्लेख गरे । कार्यक्रममा थापाले राजतन्त्र हटाउनु तथा गणतन्त्र ल्याउनु प्रधानमन्त्री र सरकार फेरे जस्तो नभएको दावी गरे ।

कार्यक्रममा बोल्दै थापाले राजनीतिक दलहरुलाई राजतन्त्रबारे संविधानसभा पहिलो बैठकबाटै निर्णय नगर्न आग्रह गर्दै जेठ १५ गतेको बैठकबाट राजतन्त्रबारे निर्णय भए मुलुकमा ठूलो दुर्घटना निम्तिने चेतावनी दोहोर्‍याए । कार्यक्रममा थापाले संघीयता, आत्मानिर्णयको अधिकार र सेना समायोजन बिषयले संविधान लेखनलाई वाधा पुर्‍याउनसक्ने बताउँदै संविधानसभा चुनाव भएपनि नेपालमा संविधान नै नलेखिनसक्ने समेत दावी गरे ।