जेष्ठ सभासद कुलबहादुर गुरुङले सभासदहरुलाई सपथ गराए

मंगलबार संविधानसभामा निर्वाचित ५६७ जना सभासदले सपथ लिएका छन् । नयाँबानेश्वरस्थित वीरेन्द्र अन्तराष्ट्रिय सम्मेलन केन्द्रमा सभासदहरुलाई जेष्ठ सभासदका रुपमा कुलबहादुर गुरुङले सपथ गराएका थिए ।

गुरुङले पहिले आफै सपथ लिएपछि अरु सभासदलाई सपथ गराएका थिए । जेष्ठ सदस्यका रुपमा गिरिजाप्रसाद कोइरालाले सपथ गराउनुपर्नेमा उनी प्रधानमन्त्री रहेकाले गुरुङले सपथ गराएका हुन् ।

महोत्तरीबाट विजयी भएका शरदसिंह भण्डारी र सिन्धुलीबाट विजयी विषमलाल दनुवारले भने सपथ लिन पाएनन् । उनीहरुमाथि संविधानसभा अदालतले मुद्दा चलाइरहेकाले उनीहरुलाई सपथ लिनबाट रोक लगाइएको छ । मन्त्रिपरिषदले मनोनयन गर्ने २६ जनाको पनि हालसम्म टुंगो लाग्न सकेको छैन ।

यस्तै सभासदहरुले पहिलोपटक आफ्नै भाषामा सपथ लिएका छन् । विभिन्न ४० भाषामा संविधानसभा सदस्यले सपथ लिएका थिए ।