पहिलो बैठक अझै बस्न सकेन

दलहरुबिच राष्ट्रपतिको कार्यक्षेत्रबारे सहमति हुन नसक्दा संविधानसभाको पहिलो बैठक अनिश्चित बनेको छ ।

आज बिहान ११ बजे सुरु हुने भनिएको पहिलो बैठक बालुवाटारमा दलहरुबिच छलफल जारी रहेकाले ३ बजेसम्मका लागि स्थगित गरिएको थियो । तर अहिलेसम्म वालुवाटारमा सहमतिको कुनै संकेत देखिएको छैन । सिङ्गो मुलुक गणतन्त्र घोषणाको प्रतिक्षा गरिरहेको बेला बैठकमा सहभागी नेताहरु भने चिया खाँदै आराम गरिरहेको बुझिएको छ ।

विशेष गरी राष्ट्रपतिको कार्यक्षेत्रका विषयमा एमाले, कांग्रेस लगायतका दलहरु र माओवादीबिच विवाद देखिएको हो । अन्य दलले राष्ट्रपति र प्रधानमन्त्रीमा शक्ति बाँडफाँड गर्नुपर्ने प्रस्ताव गरे पनि माओवादीले दुईवटा शक्ति बाँडफाँड गर्न नहुने अडान लिएका छन् ।

यता संविधानसभा बैठकस्थल विरेन्द्र अन्तराष्ट्रिय सम्मेलन केन्द्रमा भने सबै दलका सभासद, आमन्त्रित सदस्यहरु, कुट्नीतिक नियोगका प्रतिनिधि, सञ्चारकर्मी लगायतको उपस्थिति रहेको छ । सबै वालुवाटारमा भईरहेको छलफलको निष्कर्ष पर्खिरहेका छन् ।

बैठकस्थल वरपर लगायत राजधानीका विभिन्न स्थानहरुमा सर्वसाधारण, विभिन्न संघ संस्था तथा राजनीतिक पार्टीसँग सम्बद्ध समूहहरु छिटो गणतन्त्र घोषणाको माग गर्दै नारा, जुलुस गरिरहेका छन् ।