सरकार गठन पहिले २६ जना मनोनित गर्न सुझाव

संविधान निर्माताहरुले २६ जनाको मनोनयन नगरी सरकार गठन नगर्न दलहरुलाई सुझाव दिएका छन् ।

आज राजधानीमा आयोजित एक कार्यक्रममा उनीहरुले मन्त्री परिषद्‌बाट २६ जना सभासदको मनोनयन नगरी संविधानसभाको पहिलो वैठक बसेर बिरोधीहरुलाई फाइदाको ठाउँ छाडेको बताउँदै सरकार गठन गरेर पुन: गल्ती नदोहोर्‌याउन सुझाव दिएका हुन् ।

कार्यक्रममा बोल्दै संविधान निर्माता निलम्बर आचार्यले २६ जनाको मनोनयन नगरी सरकार गठन गरे अर्को गल्ती दोहोरिनेतर्फ सचेत गराउनुभयो । उहाँले माओवादीले शक्ति केन्द्र एक ठाउँमा हुनुपर्दछ भन्नु डरलाग्दो विषय भएको भन्दै एकलौटी सरकार गठन गर्ने अधिकार कसैलाई नभएको बताउनु भयो ।  

माओवादी सभासद खिमलाल देवकोटाले माओवादीले देश र जनताको लागि आवश्यक परेमा राष्ट्रपति र प्रधानमन्त्री दुबै त्याग गरेर कांग्रेस एमाले लाई नै सरकार चलाउन दिने बताउनुभयो । देवकोटाले त्यस्तो अवस्थामा पनि सरकार बाहिरै रहेर माओवादीले संविधान निर्माणमा सहयोग गर्ने उल्लेख गर्नुभयो ।

कार्यक्रममा संविधानविद भिमार्जुन आचार्य, बार एसोसीयनका अध्यक्ष विश्वकान्त मैनाली, बारका पूर्व अध्यक्ष हरिहर दाहाललगायतको सहभागिता रहेको थियो ।