एसएलसी नतिजा सार्वजनिक, हालसम्मकै सबै भन्दा बढि ६३.७३ प्रतिशत उत्तीर्ण

परीक्षा नियन्त्रण कार्यालयले गत चैतमा लिएको एसएलसी परिक्षाको नतिजा सार्वजनिक गरेको छ । आइतबार साँझ आठ बजे परीक्षाफल प्रकाशन गरेको हो ।

यस वर्ष अहिले सम्मकै सबै भन्दा बढि नियमिततर्फ ६३.७३ र एक्जाम्टेडतर्फ ३२.२४ प्रतिशत विद्यार्थी उत्तीर्ण भएका छन् । नियमिततर्फ १ लाख ९५ हजार ६ सय ८९ र एक्जाम्टेडतर्फ १९ हजार ३ सय ३५ गरि जम्मा २ लाख १५ हजार २४ परीक्षार्थी उत्तीर्ण भएका छन् । उत्तीर्ण मध्ये नियमिततर्फ छात्र ६८ प्रतिशत र छात्रा ५९ प्रतिशत छन् ।

नियमिततर्फ उत्तीर्ण मध्ये विशिष्ट श्रेणीमा ९ हजार ८ सय ८२ जना, प्रथम श्रेणीमा ७४ हजार ७ सय ७,  दोस्रो श्रेणीमा १ लाख ५ हजार ५ सय ९२ र तृतीय श्रेणीमा ५ हजार ५ सय ८ छन् । एक्जाम्टेडतर्फ भने प्रथम श्रेणीमा ६ सय ३५, दोस्रोमा १५ हजार ७ सय ९३ र २ हजार ९ सय ७ जना तेस्रो श्रेणीमा उत्तीर्ण भएका छन् ।

जन्ममिति नमिलेकालगायत प्राविधिक त्रुटिले १ हजार ४ सय ७७ परीक्षार्थी 'विथहेल्ड' मा परेका छन् । चैत ४ देखि १४ गतेसम्म भएको परीक्षामा ३ लाख ६७ हजार ४१ जना विद्यार्थी एसएलसी परिक्षामा सामेल भएका थिए । यस पटक कक्षा १० को पाठ्यपुस्तकबाट मात्र प्रश्न सोधिएकाले उत्तीर्ण प्रतिशत बढेको परीक्षा नियन्त्रक हर्कप्रसाद श्रेष्ठले बताए ।