तीनदलको वैठक बिना निस्कर्ष टुङ्गियो

तीन दलको आजको वैठक पनि बिना निस्कर्ष टुङ्गिएको छ । मधेसवादी दलले उठाएका मागलाई अन्तरिम संविधानमा संसोधन गर्न सहमत तीनदलविच अन्तरिम संविधानमा राख्ने भाषामा विवाद भएपछि बैठक निष्कर्षविहिन बनेको हो ।

मधेसवादी दलहरुले राखेका स्वायत्त मधेस प्रदेश जस्ताको तस्तै राख्ने र सेनामा समुहगत प्रवेशका विषयमा दलहरुविच विवाद देखिएको हो । वैठकमा नेपाली कांग्रेसले सबै सहमति संविधान सभाको वैठकमा लिएर जानुपर्ने अडान राखेको छ भने माओवादी र एमालेले स्वायत्त मधेस प्रदेश पुरक संविधानमा जस्ताको तस्तै राख्न नहुने बताएका छन् ।

वैठकपछि एमाले महासचिव झलनाथ खनालले सेनामा समुहगत प्रवेश हुन नहुनेमा तीन वटै दल सहमत भएको र स्वायत्त मधेस प्रदेश राख्नेमा विमति भएकाले वैठक बिना निस्कर्ष टुङ्गीएको बताउनु भयो । सबैदलहरु विच एकपटक फेरी प्रधानमन्त्री सँग छलफल गर्ने सहमति भएको छ ।

नेपाली कांग्रेसका नेताहरुका कारण झण्डै साडे ३ घण्टा ढिलो गरी शुरु भएको वैठक करिब साडे २ घण्टा चलेको थियो ।