राष्ट्रपतिका लागि रामराजा, रामवरण र रामप्रित

लोकतान्त्रिक गणतन्त्र नेपालको पहिलो राष्ट्रपतिमा तीन र उपराष्ट्रपतिमा चार जनाले उम्मेदवारी दिएका छन् । सहमति नभएपछि माओवादी, कांग्रेस र एमालेले दुवै पदमा आ-आफ्नो उम्मेदवारी दर्ता गराएका हुन् । राष्ट्रपतिको निर्वाचन संविधानसभा भवनमा शनिबार हुँदैछ ।

माओवादीले नवजनवादी मोर्चाका अध्यक्ष रामराजाप्रसाद सिंह, कांग्रेसले पार्टी महामन्त्री रामवरण यादव, एमालेले राष्ट्रियसभाका पूर्वउपाध्यक्ष रामप्रीत पासवानलाई राष्ट्रपतिको उम्मेदवार बनाएको छ । त्यस्तै उपराष्ट्रपति पदमा माओवादीले शान्ता श्रेष्ठ, कांग्रेसले मानबहादुर विश्वकर्मा, एमालेले अष्टलक्ष्मी शाक्य (बोहरा) र फोरमले  परमानन्द झालाई उठाएका छन् । मधेशी दलले भने रामराजा प्रसाद सिंहलाई समर्थन गर्ने भएको छ ।

राष्ट्रपति र उपराष्ट्रपति निर्वाचन अधिकृतको कार्यालयले प्रकाशित गरेको कार्यक्रमअनुसार बिहीबार उम्मेदवारी दर्ता गराउने अन्तिम दिन हो । उम्मेदवार विरुद्धको दाबी, विरोध र नाम फिर्ता लिने समय सकिएपछि बिहीबार साँझ उम्मेदवारहरूको अन्तिम नामावली प्रकाशन भएको छ । शनिबार बिहान ११ देखि अपराह्न २ बजेसम्म मतदान  हुने कार्यक्रम छ ।

यसैगरी माओवादीले शान्ता श्रेष्ठ, कांग्रेसले मानबहादुर विश्वकर्मा, एमालेले अष्टलक्ष्मी शाक्य र मधेशवादी दलले परमानन्द झालाई उपराष्ट्रपतिका उम्मेदवारका रुपमा प्रस्तुत गरेको छ ।