राष्ट्रपतिका लागि सोमबार फेरि मतदान हुँदै

गणतान्त्रिक नेपालको पहिलो राष्ट्रपति चयनका लागि शनिबार भएको मतदानमा कुनै पनि उम्मेदवारले बहुमत ल्याउन नसकेपछि सोमबार पुनः मतदान हुने भएको छ ।

राष्ट्रपति पदका कुनै पनि उम्मेदवारले संविधानसभाका मौजुदा सदस्य ५ सय ९८ सदस्यको साधारण बहुमत (२ सय ९८ मत) प्राप्त गर्न नसकेपछि सोमबार बिहान ८ बजे पुनः मतदान हुने भएको छ ।

उपराष्ट्रपति पदमा भने मधेसी जनअधिकार फोरमका उम्मेदवार परमानन्द झा विजयी भएका छन् । उनी ३ सय ५ मत पाएका छन् । उनका प्रतिद्वन्द्वी माओवादी उम्मेदवार शान्ता श्रेष्ठले २ सय ४३ मत पाइन् ।

राष्ट्रपतिमा कांग्रेस उम्मेदवार रामवरण यादवले २ सय ८३ र माओवादी समर्थित उम्मेदवार रामराजाप्रसाद सिंहले २ सय ७० मत पाएका छन् ।