माओवादीद्वारा राष्ट्रिय सहमतिको सरकार गठन गर्न पहल गर्ने निर्णय

नेकपा माओवादीको केन्द्रीय कार्यसमितिको आज सम्पन्न बैठकले राष्ट्रिय सहमतिको सरकार गठनका लागि पहल गर्ने निर्णय गरेको छ । बुद्धनगरमा बिहिबारदेखि सुरु भई आज सम्पन्न उक्त बैठकले वृहत सहमतिका आधारमा सरकार गठनका  लागि आवश्यक कदम चाल्ने निर्णय गरेको हो ।

बैठकबारे जानकारी दिदै माओवादी प्रवक्ता कृष्णबहादुर महराले भोलि र पर्सिभित्र संविधानसभामा प्रतिनिधित्व गर्ने दलहरुसंग छलफल गर्ने बताए । उनले सबै दललाई सहभागी बनाई सरकार गठनका लागि पहल गरिने बताए । नेपाली कांग्रेस, नेकपा एमाले र मधेशी जनअधिकार फोरमबीचको गठबन्धन टुट्नुपर्ने तथा २५ दलकै गठबन्धन बन्नुपर्नेमा उनको जोड थियो ।