प्रधानमन्त्री दाहालद्धारा सपथ ग्रहण

नवनिर्वाचित प्रधानमन्त्री पुष्पकमल दाहाल ‘प्रचण्ड’ ले पद तथा गोपनीयताको सपथ लिनु भएको छ । आज राष्ट्रपति डा.रामवरण यादवले शितलनिवासस्थित राष्ट्रपति भवनमा उहाँलाई सपथ गराउनु भएको हो।

व्यवस्थापिका संसदको समेत भूमिका निभाइरहेको संविधानसभाबाट निर्वाचित नेकपा माओवादीका अध्यक्ष समेत रहनुभएका प्रचण्डलाई नेकपा एमाले र मधेशी जनाधिकार फोरमले समर्थन गरेका थिए ।

सपथ सामारोहमा उपराष्ट्रपति परमानन्द झा, प्रधानन्यायाधीश केदारप्रसाद गिरी, संविधानसभाका अध्यक्ष सुभाषचन्द्र नेम्वाङ, नेपाल सरकारका सचिव, प्रधानसेनापति रुक्माङ्गत कटवाल, नेपाल प्रहरीका प्रमुख ओमविक्रम राणा, सशस्त्र प्रहरी प्रमुख वासुदेव ओलीलगायत उपस्थित थिए । नेपालस्थित विदेशी नियोगका कूटनीतिज्ञ, शरद यादवको नेतृत्वमा आएको भारतीय प्रतिधिमण्डल पनि सरिक थिए ।

विगतमा दौरासुरुवाल लगाएर प्रधानमन्त्रीले सपथ लिनेगरेकोमा प्रधानमन्त्री प्रचण्डले कोट पाइन्ट र कालो भादगाउंले नेपाली टोपी लगाएर सपथ लिए । राष्ट्रपतिले ‘इश्वरसँग’ भन्ने शब्द उच्चारण गर्दा दाहालले ‘जनतासँग’ भनी सम्बोधन गर्नु भएको थियो ।