प्रधानमन्त्री दैवी प्रकोप उद्धार कोषमा सहयोग आउने क्रम जारी

सप्तकोशी बाढी पीडितको सहयोग स्वरुप प्रधानमन्त्री दैवी प्रकोप उद्धार कोषमा झण्डै दुइ करोड रुपैयाँ जम्मा भएको छ । प्रधानमन्त्री तथा मन्त्रिपरिषद्को कार्यालयका अनुसार, बिहिवार यता कोषमा १ करोड ९७ लाख ५९ हजार ८ सय ८७ रुपैयाँ जम्मा भएको छ ।

बाढी पीडितको उद्धार र राहतका लागि सहयोग गर्न सरकारले बुधवार अपिल गरेको थियो । हालसम्म गैर आवासीय नेपाली संघका संयोजय उपेन्द्र महतोले सर्वाधिक ५१ लाख रुपैयाँ उपलब्ध गराएको छ । यस्तै, नेपाली सेनाले ५० लाख, नेपाल विद्युत प्राधिकरण र त्यहाँका कर्मचारीले ३५ लाख, उद्योग वाणिज्य महासंघले १० लाख रुपैयाँ जम्मा गरेका छन् । यस अघि सरकारले सप्तकोशी बाढी पीडितका कोषमा रहेको पुरानो रकमबाटै दुइ करोड रुपैयाँ उपलब्ध गराएको थियो । प्रधानमन्त्री चीनबाट फर्केपछि थप सहयोग निकासा हुने सम्भावना छ ।