हर्षोल्लासका साथ छठ पर्व सकियो

तराईबासीहरुको महान चाड छठ आज विहान उदाउँदो सुर्यलाई अर्घ दिएपछि सकिएको छ । सुस्वाथ्य, दीर्घायू, मनोकामना पुरा गर्नका लागि विगत ५ दिनदेखि मनाउन शुरु गरिएको उक्त पर्व नजिकैको जलासयमा गई हिजो अस्ताउँदो र आज उदाउँदो सुर्यलाई अर्घ दिएपछि सकिएको हो ।

सोही अवसरमा हिजो राष्ट्रपति डा. रामबरण यादव र उपराष्ट्रपति परमानन्द झा गौरीघाटस्थित वाग्मती नदीको किनारमा गई पूजाआजा गर्नुभएको थियो । तराईका विभिन्न जिल्लाहरुमा यसलाई भव्यरुपमा मनाइएको छ ।

कोशी विपत्ती कारण यसवर्ष थुप्रै तराईवासीहरु घर फर्कन नसकेकाहरुले पनि राजधानीमै यस पर्व मनाएका छन् । यसपटक राजधानीमा पनि छठको विशेष रौनक देखिएको थियो । राजधानीको रानीपोखरी लगायत विभिन्न पोखरी तथा नदी किनारमा छठ पर्व मनाउनेको संख्या राजधानीमा गत वर्षहरु भन्दा निकै बढेको थियो ।