उपप्रधान एवं गृहमन्त्री बामदेव गौतमले सेना समायोजन विशेष समिति विघटन नहुने बताएका छन् । उनले सेना समायोजन विशेष समिति विघटन नहुने तर पुनगठन वा थप हुन सक्ने बताए ।
काठमाडौंमा २३ कात्तिक देखि शुरु भएको सामुदायिक वन क्षेत्रमा काम गर्ने दक्षिण एसियाका प्रतिनिधिहरुको दुइ दिने कार्यशाला गोष्ठिको उद्घाटन पछि पत्रकारहरुसँग कुरा गर्दै गृहमन्त्री गौतमले समिति बिघटन नहुने बताएका हुन् । हिजो संविधानसभाको बैठकमा कांग्रेस र तराइ मधेस लोकतान्त्रीक पार्टीले समिति विघठनको माग गरेपछि विशेष समितिका संयोजक समेत रहेका गौतमको पछिल्लो भनाई आएको हो । उनले समितिलाई पूर्णता दिन राजनीतिक सहमति खोज्ने प्रयास भइरहेको बताए ।
सहमति जुटाउने प्रयास भइरहेकोले समितिले काम थाल्न नसकेको गृहमन्त्री गौतमको भनाई थियो । उपराष्ट्रपति झाप्रति लच्छीत गर्दै गृहमन्त्री गौतमले सेना समायोजन विशेष समिति बैधानिक छैन भन्नेहरुको भनाई नै अबैधानिक रहेको बताए ।
समिति बैधानिक वा अबैधानिक छ भन्ने कुरा कसैले भनेर नहुने बताउँदै उनले यसको फैसला सर्वोच्च अदालतले गर्ने बताए । गृहमन्त्री गौतमले विश्वका सामु नेपाल एउटा सुरक्षित गन्तव्य भएको प्रत्याभूति दिने हिसावले सरकारले काम गरिरहेको बताए ।
