कांग्रेसलाई सरकारमा ल्याउनुपर्नेमा एमाले महासचिव खनालको जोड

नेकपा एमालेका महासचिव झलनाथ खनालले नेपाली कांग्रेसलाई सरकारमा ल्याउनैपर्नेमा जोड दिएका छन् । संविधान निर्माणका लागि कांग्रेसको सहयोग अनिवार्य भएको भन्दै कांग्रेसलाई सरकारमा आउन आग्रह गरे ।

पांचथरको फिदिममा ३० कात्तिकमा आयोजित पत्रकार सम्मेलनमा महासचिव खनालले सहमतिबाटै संविधान निर्माणको प्रक्रिया पूरा गर्न सबैले आ आफ्नो भूमिका खेल्नुपर्नेमा जोड दिए । उनले भने,'सरकारमा आएर कांग्रेसले संविधान निर्माणका लागि जिम्मेवारपूर्ण भूमिका निभाउनुपर्छ ।' कांग्रेस र माओवादीको आ आफ्नो अडानले समस्याहरु बढ्दै गएको बताए ।

मधेशका सशस्त्र समूहलाई वार्तामा आउन आग्रह गर्दै उनले वार्तामा नआउनेमाथि कारबाहीको नीति अपनाउनुपर्ने बताए ।