हत्याको विरोधमा स्थानीयवासीद्वारा प्रदर्शन, हत्यारालाई कारवाही गर्न माग

स्युचाटारका दुइ युवाको हत्या भएको विरोधमा आज स्थानीयवासीहरुले कलंकी क्षेत्रमा विरोध प्रदर्शन र चक्का जाम गरेका छन् । चक्का जामका कारण राजधानीबाट बाहिर जाने सवारी साधनहरु जान सकेका छैनन् । यसैगरी काठमाडौंका विभिन्न क्याम्पसहरु अगाडि पनि नेपाल विद्यार्थी संघले विरोध गरेको छ ।

माओवादी भातृ संगठन वाईसिएल कार्यकर्ताले गत कार्तिक चार गते धादिङको मलेखुबाट अपहरण गरेका दुइ युवाको शव धादिङको पीडा गाउँ विकास समिति दरियाल खोलामा भेटिएको छ । अपहरित पुष्कर डंगोल र निर्मल पन्तको शव पारिवारिक सदस्य, इन्सेक प्रतिनिधि सहितको टोलिद्वारा काठमाडौं ल्याइएको छ । दुबै शव अहिले पोष्टमार्टमका लागि शिक्षण अस्पताल महाराजगंजमा राखिएको छ । 

दुवै युवा काठमाडौं स्यूचाटार निवासी हुन् । अपहरित यूवाको खोजिका लागि नागरिक बेपत्ता खोजविन संर्घष समितिले विभिन्न दबाब मुलक आन्दोलन गर्दै आएको थियो । पन्त तथा डंगोल परिवारका सदस्यहरुले दोषीमाथि कडा कारवाही गरी दण्डहिनताको अन्त्य गर्न सरकारसँग माग गरेका छन् ।