एमाले र मधेशी जनाधिकार फोरमबीच छलफल

नेकपा एमाले र मधेशी जनअधिकार फोरमले सामान्य बहुमतबाट सरकार भङ्ग गर्न सकिने प्रावधानसहित संविधान संशोधन हुनुपर्नेमा जोड दिएका छन् ।

नेकपा एमाले र फोरमका नेताहरुबीच आइतबार बिहान कोटेश्वरस्थित एमाले नेता माधवकुमार नेपालको निवासमा भएको छलफलमा दुई तिहाई बहुमतबाट मात्रै सरकार बनाउन र भङ्ग गर्न सकिने संवैधानिक व्यवस्था संशोधन गर्नेबारे छलफल भएको हो ।

निर्वाचनबाट नयाँ शक्तिको उदय भएकाले सात दलको राजनीतिक सहमतिका आधारमा राज्य संचालन गर्ने भन्ने संवैधानिक व्यवस्थामा संशोधन गर्नुपर्ने प्रस्ताव फोरमले अघि सारेको संयोजक उपेन्द्र यादवले जानकारी दिनुभयो ।

एमालेका तर्फबाट निवर्तमान एमाले महासचिव माधव कुमार नेपाल, कार्यबाहक महासचिव अमृत कुमार बोहोरा, भरतमोहन अधिकारी, ईश्वर पोखरेल तथा फोरमका तर्फबाट संयोजक यादवसहित उपेन्द्र झा, डा. महादेव साह र श्यामानन्द सुमनको सहभागिता रहेको छलफलमा नेताहरुले नयाँ परिस्थितिमा नयाँ ढंगको सहमतिका साथ अगाडि बढ्नु पर्नेमा जोड दिएका थिए ।

आगामी सरकारको स्वरुप, राजनीतिक सहमतिलगायतका विषयमा फोरमले आजै माओवादी र कांग्रेससँग पनि छुट्टाछुट्टै रुपमा छलफल गर्ने संयोजक यादवले जानकारी गराउनुभयो ।