नयाँ सरकारको नेतृत्व माओवादीले नै गर्न पाउनुपर्छ - भट्टराई

नेकपा माओवादीका वरिष्ठ नेता डा.बाबुराम भट्टराईले अब बन्ने नयाँ सरकारमा माओवादी नेतृत्वको विकल्प नभएको बताउनुभएको छ । राजधानीमा आज आयोजित कार्यक्रममा उहाँले यस्तो प्रतिक्रिया दिनुभएको हो ।

संविधानसभा चुनावबाट माओवादी सबैभन्दा ठूलो दलका रुपमा स्थापित भएकाले आफूहरुले नै सरकारको नेतृत्व गर्न पाउनुपर्ने जिकिर भट्टराईको थियो । मुलुक चलाउन माओवादी नेतृत्वको विकल्प नभएको बताउँदै भट्टराईले माओवादी बाहेकको कसैले नेतृत्व गर्छु भन्नु जनताको मतको उपहास हुने दाबी गर्नुभयो ।

आफूहरु सहमति र सहकार्यका साथ सबै दललाई मिलाएर अघि बढ्न चाहेको बताउँदै भट्टराईले नेपाली कांग्रेसका केही नेताले सरकारको नेतृत्व नछाड्ने भन्दै दिएको अभिव्यक्ति जनभावना विपरित भएको बताउनुभयो ।