एकलौटी सरकार बनाउने दाबी

गठबन्धन सरकार बनाउन अन्य दलसँग हदैसम्मको प्रयास सम्भव नभए एकलौटी सरकार बनाउने दाबी माओवादीका प्रवक्ता एवं सूचना तथा सञ्चारमन्त्री कृष्णबहादुर महराले गरेका छन् ।

अर्न्तराष्ट्रिय मजदुर दिवसमा अखिल नेपाल ट्रेड युनियनले राजधानीमा आयोजना गरेको सभामा महराले सरकारको नेतृत्व गर्ने अधिकार माओवादी बाहेक कसैलाई नभएको बताएका हुन् । उनले सरकारको नेतृत्वको जनादेश आफ्नो पार्टीले मात्रै पाएको अडान राख्दै रोक्न खोज्ने शक्तिको पतन हुने चेतावनीसमेत दिएका छन् ।

आफ्नो दल सहकार्य र सहमतिको पक्षमा रहेको बताउँदै उनले कांग्रेस, एमालेलगायतका दलले संयुक्त सरकारमा संविधानसभाले दिएको जनादेश अनुरूपको स्थान पाउने दाबी गरे ।

महराले राजतन्त्रको आयु अब केही दिनमात्रै बाँकी रहेको दाबी गर्दै माओवादीले राजतन्त्रको अन्त्य र संघीय गणतन्त्रको संस्थागत गर्नुलाई मुख्य सूचीमा राखेको बताए । सामन्ती उत्पादन सम्बन्धको अन्त्य गर्दै मजदुरमुखी शासन लागू गर्ने योजना राख्दै उनले  त्यसपछि मुलुक आर्थिक क्रान्तिको चरणमा पुग्ने बताए ।

कार्यक्रममा नेपाल उद्योग वाणिज्य महासंघका अध्यक्ष कुशकुमार जोशीले व्यवसायीलाई मालिक भनी सम्बोधन नगर्न आग्रह गर्दै रोजगारदाता र श्रमजीवीबीचको संवाद सहकार्य अघि बढाएमा आर्थिक क्रान्ति  हुनसक्ने बताए ।

नेवाः राज्य समितिका इन्चार्ज तथा संविधानसभासद हितमान शाक्यले माओवादीलाई सत्तामा जानबाट रोकिए जनताले प्रतिरोध गर्ने चेतावनी दिए । अर्का वक्ता अखिल नेपाल ट्रेड युनियनका अध्यक्ष शालिकराम  जमरकटेलले पनि सरकारमा जान नदिए वोद्रोह नै हुने बताए । 

वाईसीएलका अध्यक्ष गणेशमान पुनले वाईसीएल संयम भएकाले मात्रै निर्वाचन सम्पन्न भएको बताउँदै वाईसीएललाई जनताले अनुमोदन गरेको दाबी गरे । कसैले विघटन गर भन्दैमा वईसीयल विघटन हुँदैन भन्दै साम्यवाद नल्याई वाईसीएलको विघटन नहुने उनको जिकिर थियो ।