नेपाली कांग्रेसका उपसभापति एवं शान्ति तथा पुननिर्माण मन्त्री रामचन्द्र पौडेलले माओवादीले मुलुकलाई अधिनायकवादतर्फ धकेल्न खोजेको आरोप लगाउनुभएको छ ।
राजधानीमा आज रिपोर्टस क्लब नेपालमा भएको साक्षात्कार कार्यक्रममा बोल्दै मन्त्री पौडेलले कांग्रेसले सरकार नछाडे धकेलेर हटाउने भन्ने माओवादीको भनाइ अधिनायकवादी भएको बताएका छन् । सहमतिको साटो धम्क्याउने माओवादीको प्रवृतिले माओवादीको सरकार नबन्ने धारणा राख्दै पौडेलले राजालाई हटाउन लागिएको बेला अर्को अधिनायकवादको खतरा देखिएको बताउनुभयो ।
कार्यक्रममा पौडेलले माओवादीले कमल थापाहरुलाई सम्मान तथा गिरिजाप्रसादहरुलाई अपमान गरेको आरोप लगाउँदै माओवादीको यस्तै प्रवृति जारी रहे कांग्रेस चुप लागेर नबस्ने चेतावनी समेत दिनु भएको छ ।
एउटै मुलुकमा दुइ सेना र राजनीतिक दलको छुट्टै हतियार हुननहुने भन्दै माओवादीले आफूसँग भएका हतियार बुझाउनुपर्ने वा जलाउनुपर्ने पौडेलको धारणा थियो । माओवादी सेना राष्ट्रिय सेनामा समायोजन गर्नु सरकार र माओवादीको मात्र बिषय नभएको उल्लेख गर्दै पौडेलले माओवादी सेनालाई सेनामा समायोजन गरिए मधेशका समूह, चुरेभावर, ताम्सालिङले पनि सेना बनाइरहेको छन् भन्नेतर्फ ध्यान दिएर दीगो काम गर्नुपर्नेमा जोड दिनुभयो । उहाँले सेनामा राजनीतिकरण गर्न खोजिए गम्भीर खतरा उत्पन्न हुनेतर्फ सचेत गराउनुभयो ।
