माओवादी र एमालेबीचको विवाद अन्त्य

नेपाल कम्युनिस्ट पार्टी माओवादी र एमालेबीच मन्त्रिपरिषद् गठनमा देखिएको विवाद अन्त्य भएको छ ।

माओवादी अध्यक्ष एवं प्रधानमन्त्री पुष्पकमल दाहाल र एमाले महासचिव झलनाथ खनालबीच आज माओवादी संविधानसभा दलको कार्यालयमा भएको छलफलमा दोस्रो मर्यादाक्रममा राख्न माओवादी सहमत भएपछि विवाद अन्त्य भएको हो ।

एमालेबाट मन्त्रिपरिषद्‌मा प्रतिनिधित्व गर्ने वामदेव गौतमलाई दोस्रो मर्यादाक्रममा राख्न माओवादी सहमत भएको छ । एमालेले मन्त्रिपरिषद्‌मा सहभागिताका लागि यसअघि निर्णय भइसकेको नामहरुमा परिवर्तन नहुने जनाएको छ ।
गत शुक्रबार गठन भएको मन्त्रिपरिषद्मा एमाले सहभागी हुने भनिए पनि अन्तिम अवस्थामा मर्यादाक्रममा विवाद भएपछि एमाले मन्त्रीहरुले सपथ लिएका थिएनन् ।  एमालेले सरकारमा नेता गौतमको नेतृत्वमा छ जनालाई पठाउने निर्णायगरिसकेको छ । एमालेले गृहमन्त्रीमा वामदेव गौतम, जलस्रोत मन्त्रीमा विष्णु पौडेल, स्थानीय विकासमा रामचन्द्र झा, वन मन्त्रीमा किरण गुरुङ, उद्योग मन्त्रीमा अष्टलक्ष्मी शाक्य, युवा तथा खेलकुदमा गोपाल शाक्यलाई पठाउने निर्णय गरेको छ ।