सन्तोष लामा बने नेपाली तारा-२

धादिङका सन्तोष लामाले नेपाली तारा दोस्रो संस्करणको उपाधि जितेका छन् । कमलादीस्थित नेपाल प्रज्ञाप्रतिष्ठानमा शुक्रबार भएको अन्तिम प्रतिस्पर्धामा झापाका तारालक्सम लिम्बूको चुनौतीलाई समाप्त पार्दै उनले उपाधी चुमेका हुन् ।

उपाधिसँगै उनले २ लाख रुपैयाँ र मोटरसाइकल तथा सिंगापुर र मलेसियाको भ्रमणको अवसर प्राप्त गरेका छन्  । त्यस्तै उनले माया म्यूजिकको तर्फबाट एल्बम र म्युजिक भिडियो निर्माणको 'कन्ट्रयाक्ट' पनि हात पारे ।

हास्य कलाकार जोडी मह (मदनकृष्ण श्रेष्ठ र हरिवंश आचार्य) ले 'नेपाली तारा-२' को उद्‌घोष गर्दा सन्तोषका फ्यानहरु खुसीले नाचिरहेका थिए ।

मुलुकभरका ११ हजार ३ सय ४७ प्रतिस्पर्धीलाई पछि पार्दै उपाधि जित्न सफल भएका लामाले घोषणापछि भने -'आज मेरो सपना....मेरी आमाको सपना पूरा भयो र मलाई साथ दिने सबैको पनि...'। उनी रत्नराज्य लक्ष्मी क्याम्पसमा स्नातक तेस्रो वर्षमा अध्ययनरत छन् ।